नइकी दुलहिया.

बघेली कविता.

डेहरी म अँसुअन के धार छोडि आई हइ..

नइकी  दुलहिया भतार छोडि आई हइ.

काजे म जउन कुछु मइके म पाइसि तइ

हांथे कइ मेहदी,स्रिंगार छोडि आई हइ.

मेहरारू छोडि ससू, कार जउन मागइ त,

अइसन उ जाहिल, गमार छोडि आई हइ.

राति दिना फफकति हइ भीति के आड़े म,

जइसइ के सगला भड़ार छोडि आई हइ.

सासु बहुत रोबति है पढ़ी लिखी पुतउ क,

छोलइ क ओकर बगार छोडि आई हइ.

जउने म बपुरी क चाहिनि तइ जारइ क,

अँगने म कॅंडा उजारि छोडि आई हइ.

इहउ हबइ मुद्दा कुछु एहूँ पर सोचा त.

सोचइ क एक ठे विचार छोडि आई हइ.

जय सिंह"गगन"